Convivencia
Es unha desas persoas afortunadas que comparte a súa vida cun ou máis cans? Entón isto interésache!
Sabemos que che encanta ir co teu compañeiro a todos os sitios e, por sorte, en Ferrolterra son cada vez máis os establecementos pet friendly, pero para que cada vez teñamos máis lugares a onde ir co noso can é importante que cumpramos unhas normas básicas e que deixemos a mellor das nosas pegadas en cada lugar que visitemos.
Apúntaste ao noso manifesto?
Velaquí tes unhas cantas recomendacións!
- O teu can seguro que sabe de memoria o seu nome porque o chamas cen veces ao día, pero iso non quita para que leves a súa documentación encima por se xorde algún imprevisto, como pode ser un pequeno accidente que requira ir a un veterinario; neste caso, levar o seu pasaporte permitirá axilizar a atención que precise.
- Non saias sen bolsas hixiénicas e unha botella de auga para diluír os ouriños nas beirarrúas, fachadas, mobiliario urbano etc. É moi importante que manteñamos limpa a nosa imaxe e a nosa contorna!
- O teu can non vai contaminar unha fonte por beber dela, isto ben o sabemos, pero o certo é que pode resultar molesto para moitos humanos que a utilizan, e é importante que sexamos respectuosos cos demais. Unha posible solución é improvisar un bebedoiro botando a auga nunha bolsa.
- Queres entrar nun establecemento e non sabes se o teu can pode entrar contigo? Se non ten cartel na porta que o aclare, debes preguntar. A lexislación deixa a criterio dos propietarios dos establecementos darlles a benvida ás persoas que van en compañía dos seus cans, así que é mellor preguntar antes de entrar. Haberá sitios que nunca pensaron en tal cousa, pero seguro que che abrirán as súas portas se lle preguntas educadamente e se comproban o ben que se porta o teu compañeiro.
- É importante dar unha boa impresión. Se respectamos as normas dos establecementos, mostramos bos modais, levamos limpo o noso can e non molestamos os demais usuarios, estaremos dando exemplo e animando a outros locais a que se convertan en pet friendly.
- Se vas reservar nun restaurante, avisa que vas co teu can ou cans. Deste xeito, poderanche asignar unha mesa nunha zona tranquila!
- En hoteis, casas rurais etc., tenta que estea contigo sempre, tanto para evitarlle situacións de tensión como para lles transmitir tranquilidade aos teus anfitrións e a outros hóspedes. Se necesitases deixalo no cuarto polo motivo que sexa, pregunta se é posible, porque non adoita estar permitido.
- Se tes algún plan e non pode acompañarte, busca un hotel ou unha gardería canina. É unha forma de evitar que estea só e, así, quedaremos todos máis tranquilos e contentos.
- Procura estar atento sempre, xa que a curiosidade dos nosos compañeiros de catro patas é notoria e poden tirar ou estragar algo sen querer. Utiliza correa curta ou acurta a que leves para evitar que isto ocorra.
- Nos locais onde se consuma comida ou bebida, tenta que se acomode baixo a mesa ou ao teu lado, co fin de evitar molestar a quen te estea atendendo e a outros clientes. E, se esqueciches o bebedoiro, pregunta sempre se teñen algún utensilio que poidas utilizar.
- Á hora do paseo, lembra que na vía pública debe ir sempre con correa e colar ou con outro elemento de retención. Nas sendas e camiños de ámbito rural, onde está permitido que goce en liberdade, ten coidado de que non lles ocasione danos, molestias nin riscos a outras persoas, animais ou cousas.
- En Ferrolterra, temos un gran patrimonio natural con espazos e especies de especial protección, así que che agradecemos que nos axudes a coidalo e que respectes sempre as indicacións. Nalgúns lugares, como o Parque Natural Fragas do Eume, o teu compañeiro só poderá acompañarte se vai con correa curta non extensible e polos carreiros habilitados. Se desexas descubrir, por exemplo, as marabillosas praias de Valdoviño, non poderá ir contigo, xa que nese hábitat viven especies protexidas; porén, temos praias onde si poderedes gozar fóra do horario de uso e praias caninas todo o ano.
- Se vas co teu can de asistencia, has de saber que en Galicia ten garantido o acceso contigo a calquera lugar, establecemento ou transporte de uso público, con independencia da súa titularidade pública ou privada. É importante que leves sempre a súa documentación por se cha piden.
- Parécenche demasiadas normas? Lembra que é labor de todas e de todos os que vivimos con cans abrir o camiño cara a unha convivencia similar á doutros países. Para conseguir isto debemos dar exemplo e ser conscientes de que, cada vez que imos co noso can a un establecemento, representamos a todas as familias multiespecie e de que do noso comportamento pode depender a benvida ou non a outras no futuro.
É importante tamén ter presentes as necesidades do noso compañeiro: se imos facer unha escapada con el a Ferrolterra, hai que ter en conta que hai festas e romarías que se celebran ao longo de todo o ano, por iso convén informarse antes, sobre todo se o noso can lle ten medo á pirotecnia, para lle evitar unha tensión innecesaria.